Fréttir  

Samhliða kynningu lýsingar fyrir mótun nýs aðalskipulags er birt vefkönnun til íbúa annarsvegar og landeigenda/ábúenda hinsvegar. Könnununum er ætlað að draga fram upplýsingar og sjónarmið um helstu viðfangsefni aðalskipulags. Óskað er eftir að svör berist fyrir 7. apríl 2026. 

Ábendingar og svör verða tekin til umfjöllunar skipulagsnefndar í næstu áföngum skipulagsverkefnisins.

Bæjarstjórn samþykkti lýsingu fyrir skipulagsverkefnið á fundi sínum 26. febrúar sl. í samræmi við 1. mgr. 30. gr. skipulagslaga og hefur hún verið birt í Skipulagsgátt með umsagnarfresti til 7. apríl 2026. 

Tilgangur lýsingar er að kynna fyrir íbúum og öðrum hagsmunaaðilum hvernig staðið verður að skipulagsvinnunni og hver eru helstu viðfangsefni. Allir hagaðilar eru hvattir til að kynna sér lýsinguna og senda sínar ábendingar um efni hennar, annað hvort í Skipulagsgátt eða til skipulag@stykkisholmur.is, til að tryggja að verkefnið nái yfir umhverfis- og skipulagsmál sem á þeim brenna. 

Kynningarfundur um lýsinguna verður í Félagsheimilinu Skildi þann 12. mars kl. 17:00. Þar gefst tækifæri til að spyrja út í aðalskipulagsverkefnið og ræða viðfangsefni í umhverfis- og skipulagsmálum.

Vinna er hafin við mótun nýs aðalskipulags fyrir Sveitarfélagið Stykkishólm. Skipulagið verður það fyrsta eftir sameiningu Stykkishólmsbæjar og Helgafellssveitar. Í aðalskipulaginu verður mörkuð framtíðarstefna sveitarfélagsins um þróun þéttbýlis og dreifbýlis. 

Á íbúafundi í Höfðaborg þann 8. desember sl. var vinnuferli við mótun nýs aðalskipulags kynnt og farið yfir helstu viðfangsefni og nálgun við stefnumótun. 

Sveitarfélagið þakkar þátttakendum fyrir komuna og hvetur íbúa alls sveitarfélagsins til að fylgjast með framgangi mótunar nýs aðalskipulags hér á aðalskipulagsvefnum. Þar verða meðal annars birtar fréttir um íbúasamráð. Íbúar eru hvattir til að koma á framfæri sínum sjónarmiðum um framtíðarþróun sveitarfélagsins. Senda má inn hugmyndir og sjónarmið hvenær sem er á meðan nýtt aðalskipulag er í mótun. Þær sendist á netfangið adalskipulag@stykkisholmur.is.

Innan tíðar verða birtar vefkannanir þar sem leitað verður til íbúa og landeigenda varðandi stöðu og þróun umhverfis- og skipulagsmála í þéttbýli og dreifbýli. Þar til þær verða birtar er velkomið að senda ábendingar og sjónarmið til skipulag@stykkisholmur.is.

Í verkefnislýsingu verður síðan gerð grein fyrir hvernig staðið verður að frekara samráði í síðari áföngum skipulagsvinnunnar.

Í verkefnislýsingu fyrir mótun aðalskipualgs verður farið yfir viðfangsefni m.t.t. stöðu og þróunar í umhverfis-, atvinnu- og samfélagsmálum, sem og út frá frumgreiningu á stefnu og áætlunum á heims-, lands- og svæðisvísu sem eru tilkomnar eftir gildistöku eldra aðalskipulags.  Þar ber helst að nefna landsskipulagsstefnu.

Einnig eru viðfangsefnin skilgreind út frá  stefnuskjölum og áherslum sveitarfélagsins sem kalla á samræmingu og nánari útfærslu m.t.t. skipulags.

Fyrsti áfangi mótunar nýs aðalskipulags er gerð verkefnislýsingar, sbr. 1. mgr. 30. gr. skipulagslaga þar sem segir: „Þegar vinna við gerð aðalskipulagstillögu hefst skal sveitarstjórn taka saman lýsingu á skipulagsverkefninu þar sem fram kemur hvaða áherslur sveitarstjórn hafi við aðalskipulagsgerðina og upplýsingar um forsendur og fyrirliggjandi stefnu og fyrirhugað skipulagsferli, svo sem um kynningu og samráð við skipulagsgerðina gagnvart íbúum sveitarfélagsins og öðrum hagsmunaaðilum. Leita skal umsagnar um hana hjá Skipulagsstofnun og umsagnaraðilum og kynna hana fyrir almenningi.“